АРХЕОЛОГИЈА ЗА ДЕЦА

Едукативно катче за деца од денес е отворено во Археолошкиот музеј на Македонија

Во Археолошкиот музеј на Македонија од 11 јануари 2017 година почна да работи едукативно катче наменето за деца од предучилишно и од основно образование, со цел тие на интерактивен и забавен начин да добијат знаење за богатото културно-историско наследство на државата.

Децата што ќе го посетуваат ќе имаат можност своите впечатоци и стекнатите знаења за археологијата и за богатите археолошки артефакти од Македонија креативно да ги изразуваат преку моделирање во глина, цртање или пишување есеи.

Гости на првиот ден од работилницата, која е дел од пректот „Млади археолози“, беа ученици во второ одделение од ОУ „Лазо Ангеловски“ од Ново Лисиче. Тие имаа можност да цртаат предмети најдени на локалитетите, да копаат со лопатчиња во земја во која се ставени „пронајдоци“ или да прават накит нижејќи камчиња.

Во катчето е достапна и анимација преку две едукативни видеоигри од серијалот „Археологика“. Засега се изработени две: „Меморија“ и „Збирката на кустосот“, а уште две видеоигри се во фаза на изработка. Целта е преку игра и забава да научат поими од археологијата и да може да ги препознаваат најпознатите артефакти од земјава.

На отворањето на едукативното археолошко катче присуствуваше министерката за култура Елизабета Канческа-Милевска која во изјава за медиумите истакна дека катчето за едукација за деца, преку практична и научно-истражувачка работа приспособена на нивната возраст, ќе биде исклучително значаен извор за надградба на нивните знаења од областа на археологијата, музеите, историјата.

„Во овие неколку изминати години успеавме преку поддршка на голем број проекти да ги доближиме нашите национални институции до младата популација. Бидејќи е многу важно тие да се во институциите, посебно во музеите, за од млади години да ја подигнат свеста за значењето на културата и на нашето вредно културно наследство“, истакна Канческа-Милевска, посочувајќи дека таква цел имале и проектите реализирани во други музеи, како Музејот на Македонија, Музејот на македонската борба и други.

На децата гости таа им го подели музејскиот водич наменет за деца „Запознавање со минатото, археологија за деца“ од Анета Фиданоска.

Директорката на Археолошкиот музеј на Македонија, Весела Честоева, рече дека едукативната археолошка работилница произлегла од проектот „Млади археолози“ со кој музејот аплицирал за поддршка во Министерството за култура.

„На наше големо задоволство проектот го реализиравме. Станува збор за простор од 50 метри квадратни во Археолошкиот музеј, каде што со најсовремени реквизити успеавме да го доближиме богатото културно наследство до најмладите, што ни беше и целта. Имаме симулација на археолошки локалитет каде што децата ќе може интерактивно да се запознаат и да видат што значи археолошки локалитет, каде излегуваат предметите за да стигнат до музејските витрини“, рече Честоева.

Археолошкиот музеј ќе ги контактира градинките и основните училишта за да организираат посети на едукативното катче, кое освен во понеделник ќе биде отворено секој работен ден од 10 до 18 часот.

Сведоци сме на уште едeн во типично балкански стил политички „реалити шоу“ со повлекувањето на целокупниот персонал (!) на амбасадата на Србија во Скопје, вклучувајки ја и нејзината екселенција амбасадор!?

повеќе

Собранието треба да се врати во претходната состојба.

повеќе

Нашата страна или многу наивно играла според некои свои знаења и без правила и принципи или ја свиткала кичмата.

повеќе