Медијаторот во грчко-македонскиот спор за името, Метју Нимиц по денешната средба со премиерот Никола Груевски изјави дека добил силно уверување оти решавањето на проблемот е врвен приоритет на македонскиот државен врв, што е охрабрување за него.
Нимиц на прес-конференцијата по средбата со премиерот не сакаше да прецизира за какви идеи и предлози станува збор за, како што вели, да не го попречува процесот.
„Инволвиран сум во ова прашање од 1994 година и не можам да кажам дека станува збор за сосема нови идеи. Но, работите се издигнуваат на други нивоа и во други контексти и сметам дека секогаш постои можност за креативност и да се дојде до позитивен заклучок“, рече Нимиц.
Медијаторот истакна оти е охрабрен од разговорите во Скопје и Атина и најави дека ќе ја забрза динамиката на преговори во Њујорк.
Со двајцата преговарачи, Зоран Јолевски и Адамантиос Василакис, ќе работи на разработка на идеите кои се конструктивни и обмислени и се надева оти ќе има напредок.
