Загреб: Србија мора да се придружи на санкциите на Русија

Хрватска континуирано работи на тоа Западниот Балкан да остане во фокусот на НАТО, изјави министерот за надворешни и европски работи Гордан Грлиќ Радман откако во Букурешт беше усвоен извештај за овој дел од Европа. Грлиќ Радман кажа дека Хрватска, како земја во непосредното соседство на Западниот Балкан, „е најповикана објективно да сведочи и да освестува за ситуацијата“, за да придонесе на усвојувањето на клучни документи и политики на Алијансата.

EPA-EFE

„Ние континуирано работиме на тоа Западниот Балкан да остане во фокусот на НАТО“, истакна шефот на хрватската дипломатија. Додаде дека западниот воен пакт „во стратегискиот концепт уважил одредени ставови“ на Хрватска и дека во него се зборува за важноста на Западниот Балкан.

Извештајот се фокусира поединечно на секоја земја од Западниот Балкан и се укажува на тоа кои од нив „се можеби најпорозни кон руското влијание“ и кои „најмалку ја следат европската безбедносна и надворешна политика“.

Грлиќ Радман повтори дека Србија мора да се придружи на санкциите на Русија и дека мора да биде поексплицитна, подоследна и поверодостојна ако сака да ја оствари европската перспектива.