Си-ен-ен: САД планираат драстично да ја прошират програмата за обука на украинските војници

Вашингтон размислува за значително проширување на својата програма за обука што американската војска им ја дава на украинските сили, рекле повеќе официјални лица за Си-ен-ен, кој вели дека Американците според тоа би можеле да обучуваат по околу 2.500 украински војници месечно во американската воена база во Германија.

Фото: ЕПА

Таа промена не само што значително ќе го зголеми бројот на Украинците што се обучени од американската војска, туку и разните видови обука.

Во моментов, Украинците се главно обучени во релативно мали групи да користат конкретно оружје.

Но доколку програмата драстично се прошири, како што сугерираат најавите, Си-ен-ен пренесува дека „значително поголеми групи украински војници би добиле обука за употреба на софистицирани тактики на бојното поле“.

Освен тоа, проширувањето на програмата за обука би значело „многу поинтензивна и сеопфатна обука“ од она што Украинците моментално го добиваат во Британија или во Полска. Администрацијата на американскиот претседател во моментов го разгледува предлогот за драстично проширување на програмата за обука.