Шефот на хрватската дипломатија: Однесувањето на Србија е неодржливо, Белград мора да одлучи

Хрватскиот министер за надворешни и европски работи Гордан Грлиќ Радман изјави денес дека е неодржливо однесувањето на Србија, која до сега одбиваше да ја усогласи својата надворешна политика со политиката на Европската Унија и да ѝ воведе санкции на Русија околу случувањата во Украина.

EPA-EFE

Грлиќ Радман тоа го кажа пред министерската средба на земјите членки на ЕУ во Луксембург и, како што пренесува Хина, додаде дека „сè повеќе расте притисокот врз Белград да се одлучи по кој пат сака да оди“.

Од Србија, како земја која преговара за членство во ЕУ, се очекува да го продолжи усогласувањето на надворешната политика со политиката на ЕУ и според нејзините вредности и принципи, кажа хрватскиот министер.

Тој кажа дека на состанокот на шефовите на дипломатиите на земјите членки на ЕУ ќе стане збор за важноста на Западниот Балкан и стабилноста во регионот.

„Босна и Херцеговина е во длабока политичка криза. Преку изборната реформа треба да се обезбеди законитост и интегритет на претстојните избори во БиХ“, порача Грлиќ Радман.