Политико: Врховниот суд на САД би можел да го укине правото на абортус

Врховниот суд на Соединетите Американски Држави би можел да го укине правото на абортус дадено со пресудата на Ро против Вејд од 1973 година, најави Политико, кој добил увид во предлог-одлуката на Врховниот суд.

Фото: ЕПА

Ако Врховниот суд ја поништи пресудата од 1973 година, тоа ќе значи дека абортусот нема да биде дозволен во околу половина од сојузните држави.

Сепак, не е јасно дали предлог-одлуката до која имал пристап Политико е конечна или може да се промени. Врховниот суд треба да ја соопшти одлуката во јуни или јули годинава.

„Ро против Вејд е погрешно од самиот почеток“, пишува во нацртот потпишан од судијата Семјуел Алито, еден од шесте конзервативни судии во Врховниот суд. Тројца судии се либерални.

Во нацртот се наведува дека во суштина не постои уставно загарантирано право на абортус и дека федералните држави ќе имаат повеќе овластувања да ја регулираат оваа област, односно да го забранат абортусот.

„Сметаме дека пресудата од Ро против Вејд треба да биде поништена“, напишаа судиите, мислејќи на пресудата од 1992 година што потврдува дека правото на абортус е уставно право, но делумно им дозволува на државите да воведат некои ограничувања.

„Време е да се почитува Уставот и одлуката за абортус да се врати кај народните претставници.“

Портпаролката на Врховниот суд не потврди дали наводите на Политико се точни.

Политико вели дека едно лице добро запознаено со случајот до редакцијата доставило копија од предлог-одлуката. Се наведува и дека судиите во декември минатата година разговарале за поништување на правото на абортус, пет (од деветмина) гласале за, а одлуката писмено треба да ја образложи судијата Семјуел Алито.

Овој извештај е објавен во време кога неколку сојузни држави, предводени од републиканците, се обидуваат да го забранат абортусот уште пред одлуката на Врховниот суд. Критичарите на ваквите политики велат дека најголемите последици ќе бидат за сиромашните жени, кои нема да имаат средства да ја прекинат бременоста во друга држава.

Прашањето за абортусот во Америка ги мобилизира гласачите од двете страни на политичкиот спектар.

Анкетата спроведена од АП и НОРЦ во декември 2021 година покажа дека демократите помасовно од порано сакаат да го заштитат правото на абортус и го гледаат како еден од приоритетите на владата. Исто така, се покажа дека мнозинството верува дека абортусот треба да биде легален во повеќето случаи. Сепак, има и такви што сметаат дека абортусот треба да се забрани по првото тромесечје.

Судијата Алито во нацртот пишува дека судот не може да предвиди како јавноста ќе реагира на одлуката, но дека тоа и не треба да го прави.

„Не можеме да дозволиме нашите одлуки да бидат под влијание на надворешни фактори, како на пример како ќе реагира јавноста.“

Лидерите на демократите во Конгресот, Ненси Пелоси и Чак Шумер, во заедничката изјава рекоа дека, доколку извештајот е точен, „Врховниот суд е на пат да ја воведе најголемата забрана во изминатите 50 години, за сите Американци, не само за жените“.

Конзервативците, како што е јавниот обвинител на Мисисипи, Лин Фич, ја поздравија оваа потенцијална одлука на Врховниот суд и рекоа дека го чекаат официјалниот исход.

Мисисипи е една од државите што сакаат да го забранат абортусот и чии аргументи се разгледуваат пред Врховниот суд.

Каква ќе биде одлуката на Врховниот суд не може однапред да се знае, но за дел од експертите наводите на Политико изгледаат автентични.

Адвокатот Нил Катјал, кој работеше за пензионираниот судија на Врховниот суд Стивен Брејер, напиша на Твитер дека нацртот му изгледа легитимен.

„Постојат многу знаци дека ова мислење е легитимно, таквата должина и длабочина на анализа би било тешко да се фалсификуваат. Тоа вели дека авторот е судијата Алито и дефинитивно звучи како него.“

Легенда под Главна слика

Фото: ЕПА

Со францускиот предлог на патот кон ЕУ македонскиот народ ќе ја изгуби историската тапија врз сопствената свест и наследство.

повеќе

Ако пак се натури овој бесмислен консензус на Франција, кој ги признава сите емоции на Бугарија, тогаш оваа неспособна власт ќе не одведе подлабоко од сегашниот амбис.

повеќе

Во новите предлози се направени само формални, но не и суштествени промени, во однос на претходниот предлог (кој Владата го нема објавено).

повеќе