Израелските безбедносни сили годинава убија 118 Палестинци на окупираниот Западен Брег, соопшти Канцеларијата на Високиот комесар за човекови права на Обединетите нации (ОХЦХР).
Говорејќи на неделната прес-конференција на Канцеларијата на Обединетите нации (ОН) во Женева, портпаролката на ОХЦХР Равина Шамдасани ја оцени последната ситуација на окупираните палестински територии.
Шамдасани истакна дека во последните недели има алармантно зголемување на конфликтот и насилството врз цивилите во регионот.
Таа рече дека израелските безбедносни сили продолжуваат да користат насилство со смртоносен исход врз Палестинците.
„Оваа година 118 Палестинци, од кои 26 деца и пет жени, се убиени на Западниот Брег, вклучително и источен Ал Кудс (Ерусалим), од страна на израелските безбедносни сили“, рече Шамдасани.
Таа истакна дека оваа година еврејски доселеници убиле тројца Палестинци, меѓу кои и едно дете.
„Убивањето или ранувањето луѓе што не претставуваат закана со употреба на огнено оружје е јасно прекршување на правото на живот“, заклучи Шамдасани.
