Финска ќе ја затвори границата за Русите кои бегаат од мобилизацијата

Финска ќе ја затвори границата за руските туристи откако Русите, поттикнати од делумната мобилизација за војната во Украина која ја најави рускиот претседател Владимир Путин, почнаа да бегаат во таа нордиска земја.

EPA-EFE

Финската влада вечерва најави дека ќе им го забрани влезот на руските туристи во земјата во следните неколку дена.

„Нашата цел е значително да се намали бројот на луѓе кои во Финска влегуваат од Русија“, кажа претседателот Саули Нинисто за државната телевизија.

Одлуката за забрана на влезот за руските туристи доаѓа во момент кога финската копнена граница е под притисок од бранот Руси кои бегаат во страв дека ќе бидат мобилизирани. Финска во изминатите денови беше под голем притисок од своите соседи од ЕУ откако одби да им го забрани влезот на руските туристи, што претходно го направија Естонија, Летонија, Литванија и Полска.