Исламска држава крева глава

Членовите на терористичката група Исламска држава претрпеа тешки порази во Ирак и Сирија, но и понатаму претставуваат закана за мирот и безбедноста не само на Блискиот Исток, туку и во Африка и Европа, каде што многу џихадисти се вратија и најдоа привремено прибежиште.

Фото: ЕПА

На тоа предупредуваат во Анкара, која е прва на удар на терористите, кои во последно време привремено се притаија.

„ИСИС, како и Курдистанската работничка партија и нејзиниот сириски разгранок Единиците за заштита на народот, продолжуваат да бидат голема закана не само за Турција, туку и за земјите од поширокиот регион, а особено за Сирија. Сѐ додека не ја спречиме соработката меѓу овие групи, невозможно е да се постигне траен мир и стабилност“, ги предупреди министерот за надворешни работи Мевлут Чавушоглу земјите-членки на меѓународната коалиција на неодамнешниот состанок во Рим.

Во Анкара ги критикуваат сојузниците, пред сѐ Америка, поради поддршката што ѝ ја даваат на опозициската група Сириски демократски сили, со која, како што тврди Турција, соработуваат и курдските терористи и џихадистите.

„Борбата против една терористичка група не може да се добие со поддршка на друга терористичка организација, бидејќи тие финансиски и логистички меѓусебно се поддржуваат“, посочуваат во Анкара.

Пентагон од самиот почеток ја вооружува оваа група од сириски Курди, која се истакна во борбата против џихадистите. Ова е еден од проблемите за кои сојузниците на НАТО, Турција и САД со години не можат да најдат заеднички јазик.

„Турција е единствената земја што во последно време се бори против ИСИС на теренот. Ние ја оневозможивме нејзината финансиска структура и досега елиминиравме 4.500 милитанти во Анадолија, Сирија и Ирак“, тврди турската влада.

Во заживувањето на активностите на припадниците на Исламска држава неодамна придонесоа и надворешни околности. Прво, многу земји се посветија себеси поради пандемијата на коронавирусот, и второ, на ИСИС ѝ одговараат судирите меѓу Америка и Иран по убиството на генералот Касим Сулејмани, кој беше познат како „еден од најголемите непријатели на ИСИС“.

Кога во март 2011 година во Сирија пристигна „арапската пролет“, Западот и Турција првично им прогледуваа низ прсти на џихадистите што нагрнаа во Сирија од целиот свет за да ѝ помогнат на тамошната опозиција да го собори режимот на Башар ал-Асад. Тие без никакви проблеми доаѓаа до Блискиот Исток, претежно преку Анадолија, бидејќи во почетокот наивно се веруваше дека на Ал Асад, како и на Хосни Мубарак и Муамер Гадафи, му се изброени деновите и дека екстремистите ќе се повлечат по неговиот пад. Кога ги консолидираа своите позиции во регионот, тие прогласија калифат (верска држава) на територијата на Сирија и Ирак и почнаа масовни прогони и вршеа терористички акции на Блискиот Исток, во Турција, Западна Европа и Африка. Повеќе од 300 цивили и припадници на безбедносните сили беа убиени во бомбашките акции во Анадолија.

По поразите во Ирак и Сирија, а особено по убиството на терористичкиот водач Абу Бакр ал-Багдади на крајот на 2019 година, погрешно се веруваше дека тоа е крајот на Исламска држава. Сепак, терористите сега се приспособуваат на новите околности. Некои во помали групи се притаија во Сирија и Ирак, чекајќи подобри денови, други се обидоа преку Анадолија со бегалците да стигнат до европските и африканските земји, од каде што и дошле пред десет години, а трети се приклонија кон Ал каеда и другите екстремистички групи, чекајќи подобри времиња. Некои земји, како Велика Британија и Холандија, не сакаат да ги примат своите муслимански државјани, иако Турција има договор со нив за екстрадиција на криминалци. Во меѓувреме им беа одземени пасошите. Но Исламска држава не исчезна. Таа е во дефанзива. Се притаи и се приспособува на новите околности на борбата. Нешто слично се случи пред две децении со Ал каеда по убиството на Осама бин Ладен во Авганистан. Голема загатка е новиот водач на Исламска држава, Ибрахим ел Хашими, чие име или потекло сè уште се непознати. Џихадистите од неодамна повторно креваат глава, не само во Ирак, Сирија и Турција, туку и во Конго, Буркина Фасо и Нигерија, каде што неодамна извршија неколку бомбашки операции.

Легенда под Главна слика

Фото: ЕПА

Насловот асоцира и на резултатите од изборите, кои, кога ќе излезе оваа колумна, ќе бидат познати, иако најретко споменуван збор во кампањата беше зборот ДЕЦЕНТРАЛИЗАЦИЈА, кој е единствен начин за остварување на сите „големи“ ветувања што ги слушнавме изминативе две недели.

повеќе

Опонентите на академик Блаже Ристовски во Македонија го квалификуваа како националист, во белградскитe кругови  го именуваа како „бугарофил“, а во Бугарија го нарекуваа „Југословен“ и „србокомунист“. А тој си остана ист, исправен пред нападите и секогаш подготвен да им одговори на критичарите.

повеќе

Ентузијазмот во првите месеци од годинава во врска со масовната вакцинација беше таков што Србија во март беше прва меѓу европските држави според бројот на граѓани што примија втора доза на милион жители. 

 

повеќе