вторник, 19 март 2024
Газа

Масовна смрт е неизбежна

Екстремниот недостиг на храна во делови од Појасот Газа веќе го надмина нивото на глад и масовна смрт сега е неизбежна доколку конфликтот веднаш не престане и наплив на храна не стигне до областите отсечени од борбите, соопшти во понеделникот глобалниот мониторинг за глад, пренесе Ројтерс.

Фото: ЕПА

Објавено на

часот

Сподели

Интегрираната класификација на фазата на безбедност на храната (ИПЦ), чии проценки се потпираат на агенциите на Обединетите нации, рече дека 70 отсто од луѓето во делови од северниот дел на Газа сега се погодени од најтешкото ниво на недостиг на храна, што далеку го надминува прагот од 20 отсто за глад.

ИПЦ рече дека нема доволно податоци за стапката на смртност, но се проценува дека жителите неизбежно ќе умираат од глад, дефинирано како две лица од секои 10.000 кои умираат дневно од глад или од неисхранетост и болести.

Министерството за здравство на Газа соопшти дека досега 27 деца и тројца возрасни починале од неисхранетост.

„Активностите потребни за да се спречи глад бараат итна политичка одлука за прекин на огнот заедно со значително и итно зголемување на хуманитарниот и комерцијалниот пристап до целото население на Газа“, соопшти ИПЦ.

„Мора да се вложат сите напори за да се обезбеди испорака на храна, вода, лекови и заштита на цивилите, како и обезбедување на здравствени, водоводни и санитарни услуги, како и енергија“.

Вкупно 1,1 милион граѓани на Газа, околу половина од населението, се соочуваат со „катастрофален“ недостиг на храна, пишува Ројтерс, со тоа што во областа 300.000 сега се соочуваат со изгледите за стапка на смртност на ниво на глад.

Со изгледите да завладее глад во Газа, предизвикан од човек, Израел ги доби најострите критики од своите западни сојузници откако започна војна против милитантите на Хамас по нивниот смртоносен напад на израелска територија на 7 октомври.

„Во Газа повеќе не сме на работ на глад. Ние сме во состојба на глад што погодува илјадници луѓе. Гладувањето се користи како воено оружје. Израел предизвикува глад“, рече шефот на дипломатијата на Европската унија Жозеп Борел на конференцијата во Брисел за помош на Газа.

Израелскиот министер за надворешни работи Израел Кац одговори дека Борел треба „да престане да го напаѓа Израел и да го признае нашето право на самоодбрана од злосторствата на Хамас“.

Кац на мрежата Икс рече дека Израел дозволил „масовна хуманитарна помош во Газа по копно, воздух и море за секој што сака да помогне“, но дека помошта е „насилно прекината“ од милитантите на Хамас во „соработката“ со хуманитарната агенција УНРВА.

Генералниот секретар на ОН, Антонио Гутереш, го нарече извештајот на ИПЦ „ужасно обвинение“ и рече дека Израел мора да дозволи целосен и неограничен пристап до сите делови на Газа.

Британскиот министер за надворешни работи Дејвид Камерон рече дека внимателно ќе го разгледа извештајот: „Јасно е дека статус кво е неодржливо. Ни треба итна акција сега за да избегнеме глад“.

Израел, кој првично дозволи помош во Газа преку само два контролни пункта на јужниот раб на енклавата, вели дека отвора повеќе рути по копно, како и дозволува поморски и авионски пратки. Првиот брод што превезуваше помош пристигна минатата недела.

Агенциите за помош велат дека сè уште не можат да добијат доволно залихи или безбедно да ги дистрибуираат, особено на север.

ТОП ВЕСТИ

ПОСЛЕДНИ ВЕСТИ