Седум години по крвавиот настан кај Очната клиника во Ѓорче Петров

Таткото на Ангел на реконструкцијата на убиството: И светот да ми го поклонат не ми вреди кога го немам мојот син

По седум години од убиството на Ангел Петковски, денеска беше извршена реконструкција кај Очната клиника во Ѓорче Петров, по одлука на Основниот кривичен суд Скопје, а на барање од одбраната на обвинетиот Насер Ештрефи.

На реконструкцијата присуствуваа родителите на починатиот Ангел, обвинетиот Насер Ештрефи, како и судијката Дијана Груевска-Илиевска.

„По барање на одбраната и по упатствата од Врховниот суд, реконструкцијата беше изведена успешно, согласно одредбите на Законот за кривична постапка. Тоа што сакам да го потенцирам е фактот што беа видени двете верзии, верзијата на одбраната и верзијата на оштетениот, односно семејството на покојниот. Судот е тој што треба да одлучи која верзија ќе биде веродостојна“, изјави адвокатката на обвинетиот, Иванка Јакимовска.

Сашо Петковски, татко на починатиот Ангел изјави дека и покрај преголемата болка тој прифатил да присуствува на реконструкцијата.

„Собрав сили и дојдов овде да ја докажеме вистината. Овде на овие скали го загубив мојот син. Мислев дека е во кома и му давав вештачко дишење. Загубата е преголема и светот да ми го поклонат не ми вреди кога го немам мојот Ангел“, низ солзи емотивно изјави таткото на убиениот Ангел. 

Во овој предмет како доказ постои снимка на која се гледа како Ангел умира на рацете на неговиот татко на скалите кај Очната Клиника во Ѓорче Петров. Оваа снимка беше пуштена во судница пред неколку години на едно од рочиштата во првостепената постапка. 

Претходно обвинетиот Ештрефи, со одлуката на Основниот кривичен суд Скопје беше осуден на 14 години затворска казна, што беше потврдена од скопската Апелација. Одлуките ги укина Врховниот суд и судењето против обвинетитот Ештрефи е вратено на повторно одлучување.

Застапник на обвинението во овој случај е јавниот обвинител Дарко Јакимовски.

Едно од главните напатствија кои Врховниот суд ги даде во неговата одлука беше да има реконструкција на настанот во кој со нож беше убоден младиот Ангел Петковски.

Убиството на Ангел Петковски се случи на 19 мај 2014 година во населбата Ѓорче Петров. Инцидентот започна со кражба на велосипед од страна на Насер Ешрефи од скопското село Грчец.

Фото:МИА

Да бидеме реални: регионот на многу начини сè уште е претежно (погрешно) разбран и (погрешно) третиран и меѓународно се нарекува „бурето барут на Европа“.

повеќе

Јане бил свесен дека деновите му се одброени и отворено говорел за тоа. Знаел дека многумина имаат причина да го ликвидираат, дека им пречи во остварувањето на нивните „повисоки цели“.

повеќе

Во македонскиот интернет простор постојано се појавуваат и гаснат портали, со што засекогаш исчезнуваат и објавените содржини.

повеќе