Спас за Маврово – во сабота протест на жителите и викендашите против негрижата на општинските власти

На 13 ноември, сабота, жителите на Леуново, Никифорово, Врбен, Маврови Анови, Маврово и сопствениците на викендици околу Мавровското Езеро ќе протестираат против негрижата на Општина Маврово и Ростуше и Националниот парк да ги реши бројните проблеми со кои населението од овој регион се соочува. Протестот ќе се одржи на паркингот пред скијачкиот центар Маврово во 12 часот.

„Спас за Маврово“ е слоганот под кој ќе протестираат мавровчани и на овој начин повторно од општината ќе побараат решавање на бројните проблеми со кои се соочуваат – дивоградбите, снабдувањето со вода и струја, редовното собирање на ѓубрето, локалните патишта, загадувањето на езерото, неконтролираната сеча на шумите... Жалосна е состојбата во Мавровскиот регион, согласни се мавровчани. Тие потсетуваат дека и покрај решението за уривање на девет куќи под хотелот Радика кај Леуново и поднесените три кривични пријави, инвеститорот Радика резорт продолжува со градежните активности.