Во иминатото деноноќие, според мерењата во 8 часот, 21 литар на квардатен метар наврнат воден талог имало во Крива Паланка, 17 во Тетово, осум во Пожаране, седум во Битола и Виница, пет литри во Прилеп и Крушево, четири во Штип, три литри на мерна станица Скопје – Зајчев Рид и Охрид, два во Демир Капија и Берово и еден литар во Струмица и Маврово.
„Во првиот дел од ноќта беше нестабилно со грмежи и појава на пороен дожд во Скопско и во поголем дел на североистокот од земјава. До изутрина преовладуваше малку до умерено облачно, а утрово во поголемиот дел од земјава има значителна ниска облачност. Утрово дува и слаб ветер со променлив правец“, соопшти УХМР.
Времето денеска ќе биде променливо облачно, посвежо и нестабилно со локален пороен дожд кој преку денот ќе се прошири од запад кон исток и ќе биде проследен со грмежи и засилен ветер. На места процесите ќе бидат во форма на невреме со интензивен пороен дожд (за кратко време поголемо количество воден талог), електрични празнења, силен ветер, над 70 километри на час и појава на град.
Максималната температура ќе биде во интервал од 22 до 28 степени, а вредноста на УВ-индексот 6.
Во Скопје променливо облачно и нестабилно со пороен дожд, грмежи и засилен ветер. Во делови од котлината процесите повремено ќе бидат и во форма на краткотрајно невреме. Максималната температура ќе достигне 24 степени.
