Го заслужи своето место меѓу бесмртните

Загинатиот припадник на „Тигрите“, Кузмановски доби спомен-биста во дворот на црквата „Св. Атанасиј“ во Брвеница

Жарко Кузмановски со неговата трагична смрт како наш бранител, припадник на македонската полиција, го заслужи своето место меѓу бесмртните. Во негова чест денес беше откриена спомен-биста во дворот на црквата „Св. Атанасиј" во Брвеница. Кузмановски кој беше член на Специјалната антитерористичка единица „Тигар" при Министерството за внатрешни работи, загина на 9 мај 2015 година, пред точно 7 години, како лидер на тим, извршувајќи службени задачи, заедно со уште 7 колеги. Тој прерано го загуби својот живот во полициската операција за неутрализирање на терористичката група во кумановската населба Диво насеље, а во одбрана на Уставот и суверенитетот на својата држава, соопшти денес Министерството за внатрешни работи (МВР).

Министерот за внатрешни работи Оливер Спасовски, директорот на Бирото за јавна безбедност при МВР, Сашо Тасевски и државнaта секретарка Магдалена Несторовска присуствуваа на комеморативен собир. На настанот присуствуваа и членови на семејството на Кузмановски, градоначалникот на Општина Брвеница, Јовица Илиевски, претставници на Сојузот на воени инвалиди, претставници на Одборот на бранители, како и митрополитот Тетовско-гостиварски г-н Јосиф и претставници од Црковниот одбор на црквата „Св.Атанасиј“.

На комеморативниот собир обраќања имаа министерот за внатрешни работи Оливер Спасовски, припадникот на САЕ Тигар – Стефан Соколов, како и портпаролот на СВР Тетово, Марјан Јосифоски.

Министерот Спасовски во своето обраќање истакна дека Жарко Кузмановски со неговата трагична смрт како наш бранител, припадник на македонската полиција, го заслужи своето место меѓу бесмртните, меѓу сите наши херои кои оставија вечна трага во историјата на нашава татковина, но и аманет за иднината на генерациите што доаѓаат, бидејќи не постои држава во чии темели не се вградени живототите на нејзините најхрабри синови.

„Така и нашата татковина Република Северна Македонија е создадена и постои благодарение на безрезервната жртва дадена од многу нејзини херои, а наши браќа, синови, татковци, другари, пријатели... Ова спомен обележје во чест и вечен помен на незаборавот кон Жарко, не е никаква отплата на долгот кон него, оти она со што тој, како и другите неговите колеги и соборци нѐ задолжиле, се враќа само со хумани, професионални, благородни дела, со сѐ она добро, чисто и честито. А загубата е ненадоместлива и речиси е невозможно да се исполни празнината што како колеги, пријатели, блиски ја споделуваме во изминативе седум години од неговото трагично загинување", рече министерот Спасовски во обраќањето пред присутните.

Модераторот на настанот, воедно и припадник на САЕ Тигар, Стефан Соколов, имаше свое обраќање во кое даде краток осврт на животот и делото на Жарко Кузмановски, како колега, пријател, сопруг и татко на две малолетни деца.

„Жарко беше вистински пример на храброст и патриотизам, а воедно и несебичност и пожртвуваност за Единицата и државата. Од страна на претпоставените беше препознаен како човек со висок потенцијал и на него се сметаше како на еден од припадниците кои треба да ја градат иднината на Единицата. Како потврда на сето тоа е неговото унапредување во лидер на тим, кој ги поседува сите суштински карактеристики на еден вистински лидер, советник, водач, обучувач, ментор. Toj беше пример за вистински професионалец и имаше несебична љубов кон професијата и колегите. Специјалната антитерористичка единица „Tигар“ со гордост го чува споменот на својот загинат припадник и херој", нагласи Соколов.

Портпаролот на СВР Тетово, Марјан Јосифоски, истакна дека 34-годишниот македонски јунак, Жарко Кузмановски, од тетовска Брвеница, борејќи се храбро падна за својата татковина, за мирот и спокојството на семејството, на најблиските...

„Жарко веќе не е меѓу нас, но секојдневно го има во споменот кој не бледее, кој ги исполнува сеќавањата на сите кои беа со него како дел од Единицата за специјални задачи, се дружеа, делеа добро и лошо и докрај останаа цврсто сплотени во едно; во силна 'тигарска' тупаница против криминалот, внатрешните и надворешните непријатели на нашата земја, нашата сегашност и иднина," потенцираше Јосифоски.

На спомен обележјето на Жарко Кузмановски цвеќе положија делегација од МВР, предводена од министерот за внатрешни работи Оливер Спасовски, претставници од МВР, претставници од Одделот за специјални полициски операции, припадници на САЕ „Тигар", како и градоначалникот на Општина Брвеница, Јовица Илиевски.

Жарко Кузмановски со највисоки почести е погребан на гробиштата во Брвеница, а постхумно е одликуван со медал за храброст од претседателот на Република Северна Македонија.

 

На 6 октомври 1946 година почна носењето на моштите на Гоце Делчев од Софија во Скопје, столицата на слободна Македонија.

повеќе

Постои нужна потреба од прилагодување на студиските програми, соодветните силабуси и наставниот курикулум на реалната потреба на пазарот на труд во државата.

повеќе

Во текот на оваа и претходната година, инфлацијата ја задуши македонската економија. 

повеќе