Протестот продолжува, пред Владата се местат шатори

По завршувањето на официјалниот дел од денешниот протест пред Владата, автомобили се паркираа пред владината зграда и дел од учесниците на протестот изјавија дека ќе кампуваат во текот на ноќта. Најавено е дека протестите ќе продолжат секој ден се додека Владата не се откаже од францускиот предлог за надминување на спорот со Бугарија за старт на преговорите за членство на Македонија во ЕУ.

Дел од граѓаните изјавија дека се подготвуваат да постават и шатори.

„Можам да кажам дека е јасно дека имаме исклучително штетен предлог кој директно задира во македонската самобитност, во македонската култура, нација, јазик и историја, предлог кој целосно ги урива темелите на македонската држава и македонскиот народ“, изјави потпретседателот на ВМРО-ДПМНЕ, Александар Николоски.

Учесниците на протестот бараат Владата и Ковачевски да го отфрлат предлогот затоа што е штетен.