За ТВ Блумберг

Бугарскиот историчар Илиев предупредува: Софија може да остане сама во спорот со Северна Македонија

Историчарот од Институтот за балкански студии при Бугарската академија на науките, Кирил Илиев во изјава за бугарската ТВ Блумберг предупредува дека Бугарија може да остане сама во спорот со Северна Македонија. 

Коментирајќи ја бугарската позиција кон Скопје и ставот на Германија како актуелен претседавач со ЕУ дека не треба да се поставуваат нови критериуми, Илиев вели дека Бугарија нема јасен концепт за целите што сака да ги постигне во односите со Северна Македонија.

„Генерално, Бугарија нема целисходна политика што строго ќе се следи и нема да се отстапува од неа. Бугарите се претерано емоционални за македонското прашање, за Северна Македонија, додека соседните земји Србија и Грција пристапуваат прагматично според нивниот интерес“, рече Илиев.

Според него, во Бугарија и во Северна Македонија, има партии и личности чиј политички живот се темели целосно на македонското прашање.

„Не постои политичка партија во Северна Македонија што не ја користи историјата како своја идеологија, но на начин што и одговара“, рече Илиев, посочувајќи ја опозициската ВМРО-ДПМНЕ, која, како што наведе, „го користи меморандумот на Бугарија за да додаде бензин во огнот“.

Тој смета дека историската дебата меѓу Бугарија и Северна Македонија не може да се избегне, зашто тоа е темелот на проблемот меѓу двете земји.

Нерешавањето на историските прашања, според него, ќе ги остави Македонците да продолжат да мислат сѐ најлошо за Бугарија и да ја прифаќаат земјата негативно. 

„Треба да се решат историските проблеми за да не останеме за денешните Македонци ‘татар-монголи, фашисти, окупатори, комунисти’. Ова е најлошото што ни се става како етикета”, истакнува Илиев.

Тој се надева дека Заедничката комисија наскоро ќе продолжи да работи и ќе ги расчисти несогласувањата.

„Погрешно беше што секоја информација за работата на заедничката експертска комисија стана јавна за луѓето во двете земји и се користеше за политички цели“, изјави Илиев.

Според него, нема проблем во комуникацијата на Бугарите со народот на Северна Македонија до моментот додека не почне да се зборува за историјата, и е убеден дека тоа е пречка за приближување на културно, спортско и економско ниво.

„Не може да се прават компромиси со историјата“, вели Илиев, осврнувајќи се конкретно на архивите за Гоце Делчев, за кого, како што посочува, македонската страна има 44, а бугарската 440 документи.

Според него, дебатата треба да се базира на историското документарно наследство, а во меѓувреме да се пристапи прагматично со изградба на автопат меѓу Софија и Скопје, железничка пруга и отворање нови гранични премини меѓу двете земји.

 

Еве што знаат мнозинството Македонци и Бугари родени до 1980 година.

повеќе

И Софија ќе треба да не го запре македонското евро-интегрирање на самиот почеток – и Скопје ќе треба да ја декомунистицира и дејугословенизира својата елита, економија, политика, наратива и медиуми.

повеќе

На светов има доволно место и за доктори и за антиваксери, и за научници и инженери, како и за рамноземјани и антимаскери, за уметници и фантазери.

повеќе