ТЕАТАРСКА ПРЕМИЕРА

Скршената стомна е симбол за скршениот получовек што исчезнува под тежината и суровоста на капиталот

Премиерата на новата, осма по ред, претстава на независната театарска куќа „Интимен театар“ во Битола е закажана на 30 декември (петок), со почеток во 20 часот. Претставата „Скршената стомна“ во режија на Софија Ристевска Петрушева е правена по мотиви од Хајнрих Фон Клајст (германски автор од почетокот на 19 век) и авторски текстови на Билјана Крајчевска.

Специјална гостинка во претставата е госпоѓа Летка Андреевска, која преживеала рак на дојка, но не дозволила болеста да ја скрши, а токму за тоа ќе говори во претставата.

„Скршената стомна“, е претстава за човекот на дваесет и првиот век, којшто е претворен во шуплива кукла, манипулирана само и единствено од моќта на капиталот. Емоциите, љубовта и семејните социјални врски, сè поретко се појавуваат во секојдневието на човекот, што е пласиран и определен само и единствено од пазарот на трудот. Кариерата и финансиската моќ се ставени пред основните човечки начела и принципи. Инстант живеењето нè осакатува и нè претвора во осамени, егоистични и антисоцијални индивидуи.

Во натпреварот за поуспешна и поисплатлива кариера, станува сè потешко да се создадат семејство и поколение, па оттука се поставува прашањето дали капиталот е доволно добар за да го замени нашето неродено дете, нашите љубовни врски... Дали капиталот е доволно емоционален да го замени човечкиот стремеж за социјална припадност?

„Скршената стомна“ е расказ за изгубениот и заблудениот човек што нема капацитет да се бори, а секогаш го избира патот на финансискиот прогрес. Со помош на огромната индустрија, таканаречена „пластична хирургија“, надворешноста се доведува до перфекција, а душевноста затапува и го губи својот фокус. Оттука и идејата дека по улиците шетаат полумртви кукли, жртви на чудовишниот капитализам, што пополека се прекршуваат и ја губат својата животна рамнотежа.

Скршената стомна е симбол за скршениот получовек што исчезнува под тежината и суровоста на капиталот! – напиша во своето образложение Софија Ристевска Петрушева, режисерка на претставата „Скршената стомна“.

Во режија на Софија Ристевска Петрушева и со драматургија на Билјана Крајчевска во претставата играат Маја Андоновска Илијевски и Никола Пројчевски. Кореограф е Кире Миладиноски.

Свој придонес во претставата имаат и Златко Кузевски (дизајн на звук), Томе Ѓорѓиевски (дизајн на светло), Ксенија Вангеловска (шминка), Кристина Серафимова Кики (фризури), Петар Тасевски (фотографии) и Владимир Видановски (дизајн), известија од „Интимен театар“.

Спортските објекти што се изградени со буџетски пари не смеат да бидат извор за заработувачка што ќе заврши во приватни џебови, ниту пак инструмент за манипулација на граѓаните и ширење на клиентелизмот.

повеќе

Политичките кризи, регионалните тензии и влошувањето на демократијата покажуваат дека постои зголемен ризик од конфликт и нестабилност на Балканот.

повеќе

Колумната е објавена на 25 септември 2010 година во весникот „Време“.

повеќе