Музика

МКЦ и хроничарот на македонската рок музика Тошо Филиповски денеска приредија уште еден настан - беа промовирани две нови компилациски винилни изданија, тематски поделени на Дарк вејв и Њу вејв, на кои се најдоа нумери од македонски бендови кои оставија силна трага во осумдесетите години. „Оваа година, нашиот Велигден се вика Record Store Day“ (Ден на независните музичките продавници) - под ова мото на отворено се преслушуваа двете лонг-плеј плочи, а новинарот Љупчо Јолевски беше промовиран во нова македонска "Worldwide Record Store Legend".

Во Националната палата на култура во клубот „Софија лајв клуб“ во Софија синоќа концерт одржа македонска џез група „Сетстат“, на кој беа промовирани песните што ќе бидат дел од нивниот нов 11-ти албум.

Танцовата компанија „Марта Греам “ од Њујорк, која е добитник на овогодишната награда „Менада“ на Фестивалот „Танц фест Скопје 2022“, денеска со почеток од 20 часот ќе настапи во рамки на 18-то издание на Фестивалот, на сцената на Македонскиот народен театар. На настапот ќе и биде доделена и наградата на актуелната уметничка директорка на „Марта Греам“, Џенет Ајлбер.

Фанк шуи годинава ја почнаа со онлајн претставување на најголемиот и најпрестижен шоукејс фестивал во Европа - Eurosonic во Холандија. Ова им овозможи оваа пролет да имаат два концерти во Англија – на 29 април во Лондон, а ден потоа ќе гостуваат на добропознатиот Sound City фестивал во Ливерпул, на кој многу артисти од музичката идустрија ја почнале својата кариера.

Пет години по големиот повратнички концерт во „Метрополис арена", поп-рок бендот Меморија на 11 јуни ќе одржи концерт под отворено небо на стадионот на Армијата во Градскиот парк во Скопје. Концертот беше најавен со прес-конференција на која членовите од бендот рекоа дека настапот е замислен како „концертна матурска рокенрол забава на генерациите". Лидерот на Меморија Петар Георгиевски - Камиказа истакна дека со истиот жар, со засилен состав, продолжуваат со работа, а дека „пробите ни одат феноменално".

Од денеска се во продажба билетите за 12-то издание на фестивалот на нова музика „Здраво млади", што ќе се одржи на 3 септември во паркот на Младинскиот културен центар (МКЦ). Од МКЦ за годинешното издание го најавија бендот „Deerhoof", калифорниската нојз панк група оформени во 1994 година.