ГРАФИЧКИ ДИЗАЈН

Изложбите од „Скопје постер фестивал“ тргнуваат на пат низ светот

Во рамките на деветото издание на „Скопје постер фестивал“, кој во изминативе 15 дена се одржа во Музејот на град Скопје, покрај изложените дизајнерски дела на 4-те изложби, се одржаа презентации и работилници на светски реномирани предавачи на теми „Македонија како туристичка дестинација“, „Дизајнирај влијателен социјален плакат“, „Плакат, уметност од улицата“ и „Дизајнирање постер за џез-настан“, наменети за студенти и професионалци-дизајнери.

На фестивалот, насловен како „Криза на идентитет“, во рамки на главната изложба на плакати од меѓународниот конкурс за плакат, беа изложени дела на студенти од сите континенти, оценувани од страна на 5-члена жири комисија составена од меѓународни судии - Мишел Буве (Франција), Фонс Хикман (Германија), Фин Нигард (Данска), Ришард Каја (Полска) и Тони Васиќ (Македонија).

Оваа година, двете главни награди ги добија Мигуел Ангел Рангел од Мексико и Река Немеди Варга од Унгарија. Двете специјални награди од жирито беа доделени на Шујун Лиу од Кина и Дикле Јилдирим од Турција. Додека, почесните признанија ги добија Јуниј / Зежун Шан / Уанг од САД, Кајли Димик од САД, Лазар Митровиќ од Србија, Инес Филипа да Коста Пимента Кардосо од Португалија, Никола Марфи од Обединетото Кралство и Карол Шчепанкиевич од Полска.

По затворањето на фестивалот, изложбата на 50-те финалисти ќе биде прикажана на Универзитетот Прат МВА (Pratt MWA) во Њујорк, САД, потоа во Литванија, Грција и Португалија.

„Секоја година битно ни е плакатите на младите дизајн-надежи да ги промовираме на повеќе локации. Минатата година изложби имавме во Бугарија, Србија и во Русија. Оваа година, планираме уште многу изложувања, покрај првично договорените во Њујорк, Порто, Солун и Вилнус“, вели Гере Постеров, претседател на невладината организација „ПлакАрт“.

Според него, покрај соработката со дизајнерската заедница во Македонија, иницирана е и соработка со релевантни факултети, што ќе овозможи студентите да добијат дополнителна практична настава преку фестивалските настаните. Дизајнерите од Македонија имаа шанса да се дружат со победникот од минатогодишниот Скопје постер конкурс, Каја Депта Клешта од Полска, која одржа и презентација во која истакна како овој интернационален конкурс ја охрабрил во постигнување на повисоки цели.

„Скопје постер фестивалот е најдобриот фестивал и конкурс за дизајн за млади дизајнери во светот. Гостите се светски познати дизајнери, жирито секогаш е составено од најдобрите во графичкиот дизајн, а ’ПлакАрт‘ е единствен во успешно промовирање на нашите дела и нас учесниците“, изјави Каја.

„Овој фестивал ги собира најквалитетните имиња од графичкиот дизајн. Скопје и Македонија можат да се гордеат со овој настан кој се случува секоја година. Навистина е чест да се биде дел од Скопје постер фестивалот“, објасни членот на меѓународното жири Ришард Каја.

Наредната година, организаторот најавува достојно, спектакуларно одбележување на јубилејот 10 години на Скопје постер фестивалот. На овој начин, вели организаторот, „ова одлично дизајнерско дружење ќе го размрда креативниот потенцијал и инспиративноста кај дизајн-заедницата“.

Нашите умни, работливи и чесни граѓани заслужуваат да имаат излез на „море" што се нарекува светски пазар.

повеќе

Како што транспортниот систем ја дефинира структурата на урбаното „ткиво", така половата поделба ја дефинира структурата на општеството.

повеќе

Киев не може да дозволи, ниту од морална, ни од правна гледна точка, нејзини претпријатија да бидат конфискувани.

повеќе