Колачиња за Грците

Атанас Величков

Треба да најдеме начин да им ја ублажиме маката на нашите комшии. Преку фондацијата што јас предлагам да се создаде може да донираме средства за да можат Грците на раат да си го пијат кафето.

Време е ние Македонците да се покажеме како добри христијани и хумани луѓе. Сега ја имаме можноста да го свртиме и другиот образ и да му дозволиме на нашиот негатор да ни мавне уште една шлаканица. Треба да направиме една фондација во којашто ќе се собираат пари за соседна Грција. Како што јавуваат странските и домашните медиуми, народот таму во блиска иднина нема да има пари ни за кафе. Ете тука треба да се покажеме ние како добри соседи. Треба да најдеме начин да им ја ублажиме маката на нашите комшии. Преку фондацијата што јас предлагам да се создаде можеме да донираме средства за да можат Грците на раат да си го пијат кафето. Ако затреба, и за колачиња ќе отвориме една банкарска сметка, бидејќи како што вели една стара мудрост: „Комшијата на пати е подраг и од брат“. Јас мислам дека не можеме да се пожалиме од нашите драги пријатели од Грција. Цел свет слушна за Македонија, најмногу поради нивната хистерија околу нашето исконско и уставно име. Веќе 20 години Грција упорно ни го пумпа патриотизмот. Со негирањето на нашето државно име, тие несвесно нè сплотија околу идејата дека треба да го зачуваме нашето национално достоинство. Тие нам не ни побараа ни денар за таа реклама. Дури имаат капитални инвестиции во нашата земја. Време е да им се оддолжиме. Еве јас давам предлог. Да собереме, кој колку што може да даде и да им купиме колачиња на Грците. Ако има добар одѕив на мојот повик, можеме освен колачиња да им купиме и неколку знамиња од главните „ѕверки“ од ЕУ, за овие напатени „душички“ да имаат што да палат на своите протести. Деновиве се појави информација дека една друга наша соседна земја (Албанија) дава државјанства во замена на инвестиција во размер од 100 илјади евра. Ако не ме лаже паметот, мислам дека пионер во тоа „продавање на државјанства“ е Црна Гора, но тоа не е толку важно. Важно е тоа дека Грците можат да земаат пример од својот сосед Албанија и да почнат и тие да „шиткаат“ државјанства. Цената би требало сами да си ја определат, и таа не мора да биде висока. Што се вели, колку за кафе да се најде и за колачиња. Очекувам деновиве да се јават и редовните „бранители“ на Грција од нашето поднебје. Да нафрлат по некој збор во знак на сочувство со нашиот јужен сосед, сепак беа многу гласни откако неколку „луди“ глави ја погребаа симболично Грција, за време на карневалот во Вевчани. Еве јас прв се нафаќам да организираме една добротворна иницијатива. Како сакате така сфатете ме. Сепак да не забораваме дека ако мечката игра кај комшијата кога тогаш и кај нас ќе дојде да ни мавне едно сиртаки. Ако денес Грците немаат ни за кафе утре, не дај Боже и ние можеме да заглавиме во истите маки. Инаку, според последните анкети, Грците не се баш најзадоволни од работењето на својот премиер Лукас Пападимос. Изгледа очекуваа од познатиот економист да дојде и со магично стапче да ја среди „каша попарата“ во којашто се наоѓа Елиники Демократија. Такво нешто не се случи, а веќе се слушаат и гласини дека Грција ќе го напушти еврото. Такви гласини се слушаа и од порано, но веќе работата е речиси „испечена“, Марк Руте, премиерот на Холандија изјави дека ЕУ презема чекори да го совлада потресот од можното излегување на Грција од еврозоната. И после се чудиме зошто демонстрантите во Грција ги нарекуваат европските бирократи „варвари“. Па како нема да ги нарекуваат така, откако станува јасно дека истите тие европски „варвари“ се подготвуваат да им ја удрат клоцата. Мака мачат нашите јужни соседи. Додека ги толерираа во нивното безобразно трошење, за нив не постоеше нешто поубаво од ЕУ. Откако се виде дека освен да трошиш, треба и да заработиш, Европејците одеднаш се претворија во варвари. Рани куче да те лае испадна работата. Но кој сум јас да ја критикувам политиката на ЕУ. Случувањата во Грција и посебно настанот со запаленото германско знаме ме потсетуваат на еден добар стар виц: „Знаете ли зошто Евреите имаат пари? Затоа што произведуваат американски знамиња и им ги продаваат на Палестинците да ги палат“. Еве уште една бесплатна идеjа, којашто ја давам курбан за благото на нашата економија. Замислете само да почнеме да произведуваме знамиња на главните земји од ЕУ, потоа ги продаваме на Грците за добра цена, а секое трето да биде гратис (за да се подлажат да купуваат повеќе). Како што сега им се „накрвени“ на старите демократии во ЕУ, нашиве јужни соседи има сите знамиња да ги искупат. И така веќе за време на нивните протести им стана досадно да палат контејнери, сега ќе се префрлат на знамиња. Им недостига сега на Грците една кралица, како познатата Марија Антоанета. Па таа да им каже: „Кога немате ни за кафе, јадете колачиња, а ако немате ни за колачиња, побарајте од Македонците да Ви купат. Време е да се запре со интригите околу нивното име. Време е за решавање на вистинските проблеми“.

Ех колку би било убаво кога последната реченица што ја напишав би станала реалност.

Врзани содржини:

1. Уште малце Грците ќе ни протестираат и за вицови
2. ЕП во ватерполо: Од страв од бламажа, Грците го откажаа ТВ-преносот
3. И Портата им пречи на Грците
4. Кредиторите пристигнаа во Атина, Грците пак на улица
5. Груевски: Нимиц во Македонија може да дојде кога сака!
6. Вевчанци им испратија писмо на Грците
7. Грците ни се фатија и за пописот
8. Со Русите и Литванците ќе ковеме планови против Грците
9. Грчките меѓупартиски преговори за намалување на трошоците без договор
10. Грција нема пари за долговите, ама има пари за ограда кон Турција